PLAASLIKE MARKTE

Die JSE Indeks van Alle Aandele het Maart op 52 250,28 afgesluit (5,7% hoër vir die maand) en is met 3,1% op vir die jaar tot op datum. Die rand het verhandel teen die beste vlakke nog dié jaar. Dit is heel moontlik as gevolg van drie faktore: (1) die Konstitusionele Hof se besluit dat president Jacob Zuma die Nkandla-geld moet terugbetaal, (2) ’n kleiner as verwagte SA-handelstekort en (3) ’n swakker Amerikaanse dollar nadat die aantal mense wat hulself as werkloos aangemeld het in die voorafgaande week verwagtinge oortref het. Suid-Afrikaners het die afgelope paar dae in spanning gewag om te sien wat die uitkoms gaan wees van die parlementêre debat oor die mosie van wantroue wat teen president Zuma ingestel is, maar dié president wat reeds soveel skandes met hom saamdra, het die stemproses oorleef. Gevolglik het die rand met meer as 2% verswak en vrese, dat internasionale graderingsagentskappe die land se skuldvlakke binnekort afwaarts sal gradeer, is versterk.

Sedert Donderdag se uitspraak het die oproepe vir Zuma om te bedank vanuit verskeie oorde opgeklink: opposisiepartyleiers, gewone Suid-Afrikaners en selfs ’n anti-apartheidaktivis wat saam met Nelson Mandela sy gevangenskap uitgedien het. Almal stem saam dat Zuma die grondwet oortree het toe regeringsfondse gebruik is om sy private woning op te gradeer. Die ‘Guptagate’-skandaal het alles nog verder vererger nadat verslae op die lappe gekom het wat aantoon dat die Guptas sakevennote is van Zuma seun Duduzane en betrokke is by Zuma se plan om soveel as R1 biljoen ($63 miljard) op kernkragsentrales in Suid-Afrika te spandeer. Aangesien die oorweldigende meerderheid van die parlement uit ondersteunende ANC-lede bestaan, was dit egter geen verrassing dat Zuma die mosie van wantroue oorleef het nie. Suid-Afrikaners voel dus steeds hulpeloos oor die politiese en ekonomiese situasie in die land.

Volgens die Credit Suisse Navorsingsinstituut se opname oor Ontluikende Verbruikers 2016 is Suid-Afrikaners die swaarmoedigste oor hul ekonomiese toekoms. Die opname groepeer Suid-Afrika saam met Brasilië en Rusland as die lande (uit ’n groep van nege) wat die slegste presteer. Hierdie lande sluit in China, Indië, Indonesië, Meksiko, Turkye en Saudi Arabië. Volgens hierdie opname het lae kommoditeitspryse, verswakte geldeenhede en politieke risiko in 2015 gelei tot die swak verbruikers- en beleggersentiment. ’n Verdere bydraende faktor is die verwagting dat Suid-Afrika se ekonomie die swakste groei gaan toon sedert die 2009-resessie en heel moontlik voor die einde van die jaar ’n afwaartse kredietgradering te wagte kan wees. Standard & Poor’s het ’n negatiewe siening van die BBB-gradering, een gradering bo rommelstatus. Moody se Beleggingsdienste gradeer Suid-Afrika se skuld op een vlak hoër.

Op ’n meer positiewe noot het die aankondiging dat die Johannesburgse Aandelebeurs (JSE) ’n mededinger gaan kry baie opgewondenheid in die media veroorsaak. Die ‘ZAR X’-aandelebeurs wat goedgekeur is om die eerste nuwe Suid-Afrikaanse beurs in meer as 100 jaar te word, sal in September begin verhandel met die oogmerk om ’n groter aantal laerinkomste beleggers die geleentheid te gee om die aandelemark te betree. Alhoewel die nuwe aandelebeurs nie werklik sal probeer om met die JSE te kompeteer nie, sal dit baie nodige en welkome kompetisie bring in die Suid-Afrikaanse finansiële arena.

Na 2015 se ongelooflike vertoning en winsneming in Februarie het Montauk Energy Holdings weer eens verlede maand baie goed presteer en was Maart se bespresterende aandeel. Die firma, wat grootskaalse herwinbare energieprojekte bedryf wat stortingsterreinmetaan aanwend, het met 59,1% op maand tot maand basis opgeskiet. Die tweedebeste vertonings is deur Murray&Roberts Holdings Ltd en Impala Platinum gelewer – albei is 40,5% hoër op ’n maand-tot-maand basis. Die Murray & Roberts-aandeelprys het ’n hupstoot gekry met die aankondiging in Maart dat die firma ’n betaling van meer as R159 miljoen gaan ontvang in verband met ’n voortslepende eis rondom die Gautrain-projek. Impala Platinum het verlede maand aangedui dat hulle beplan om hul plaaslike raffinadery binne twee jaar met waterstof en metaan-aangedrewe brandstofselle te begin aandryf. Aan die begin van Maart het markte meer duidelikheid gekry oor Lonmin (+38.6% maand-tot-maand) se herstruktureringsplanne na onthullings dat hulle hul arbeidsmag met meer as 5 000 gaan besnoei tydens herstrukturerings wat deur swak kommoditeitspryse veroorsaak is.

Na ’n sterk lopie hierdie jaar en met die beleërde rand wat effens versterk het teen die dollar, het verskeie randverskansingsaandele in Maart onder die 20 swakste presteerders getel. Dit sluit in Capital & Counties Properties (Capco; -2.8% maand-tot-maand), Richemont (-2.8% maand-tot-maand) en SABMiller (-2.2% maand tot maand).

Die Suid-Afrikaanse genoteerde eiendomsektor het vanjaar ’n rukkie geneem om aan die gang te kom (na ernstige driemaandelange daling van individuele aandele). Die sektor is egter nou weer in ’n goeie posisie na dit indrukwekkend herstel het vandat eiendomspryse ineengestort het as gevolg van die afname in beleggersvertroue toe Nhlanhla Nene in Desember in die pad gesteek is. Op daardie tydstip is toenemende politieke risiko ingeprys by genoteerde eiendom en dit het gelei tot verkope in hoofsaaklik Suid-Afrikaanse eiendomsfirmas. Buitelandse eiendomsfirma’s is nie so erg benadeel nie te danke aan beter blootstelling aan harde valuta.

INTERNASIONALE MARKTE

Dit lyk asof daar in Maart wêreldwyd ’n positiewer ingesteldheid teenoor wêreldmarkte is wat ondersteun is deur die verwagtinge dat die olieprys ’n laagtepunt bereik het, sprankies van hoop rakende die Chinese ekonomie en omdat beleggers gerusgestel is oor Europese markte na verdere stimulusmaatreëls deur die Europese Sentrale Bank (ECB) aanvaar is. Aandelemarkte het ook teen die einde van die maand versterk toe die Janet Yellen, Voorsitter van die Federale Reserweraad (Fed), gesê het dat die Fed “versigtig” moet wees wanneer besluite oor rentekoersverhogings geneem word. Hierdie opmerking weerspreek oënskynlik aggressiewe opmerkings deur ’n aantal van Yellen se kollegas vroeër die maand.

In die VSA, het die Dow Jones Industriële Gemiddelde (DJIA) verlede maand 7,1% hoër gesluit (+1,5% jaar-tot-op-datum), die grootste maandelikse toename sedert Oktober 2015. Die S&P 500 Indeks het 6,6% gegroei van verlede maand af (+0.8% jaar-tot-op-datum) en is ondersteun deur die beter as verwagte + 215 000 werksgeleenthede wat in Maart in die VSA geskep is sodat dit op 2 072, die hoogste vlak in drie maande, kon sluit. Die Nasdaq Saamgestelde Indeks styg met 6,8% vir die maand, en staan nou op 4 914, maar die indeks sluit die eerste kwartaal van 2016 met ’n 2,7% verlies af. Elders het die FTSE 1,6% maand-tot-maand gestyg (-1,1% jaar-tot-op-datum). Die CAC 40 is 1,3% hoër op ’n maand-tot-maand basis (-1,1% jaar-tot-op-datum) en die DAX 0,7% op ’n maand-tot-maand basis (-5,4% jaar-tot-op-datum).

In Maart is die MSCI Ontluikende Markte-indeks op met +13% in dollarterme en presteer 6,5% beter as die Ontwikkelde Markte na ’n maand waarin die beste prestasie in 4 en ’n half jaar behaal is. Die geldeenhede styg met +4,5% (ingesluit in die +13% opbrengs). Die MSCI Brasillië-indeks het die beste gevaar en is +30,3% hoër in dollarterme, terwyl die Suid-Afrikaanse MSCI ook styg met ’n indrukwekkende +17,5% in dollarterme.

Beleggers se kommer oor China is besig om effens af te neem nadat data komende van die wêreld se tweede grootste ekonomie ’n verbetering in verbruikersentiment getoon het. Hierby ingesluit is data wat aantoon dat China se fabrieksektor in Maart vir die eerste keer in nege maande weer groei getoon het. China se Shanghai Saamgestelde Indeks is op met 11,8% maand-tot-maand (-15,1% jaar-tot-op-datum), terwyl die Hang Seng maand-tot-maand styg met 8,7% (-5,2% jaar-tot-op-datum). In Japan sluit die Nikkei Maart 4,6% hoër af na die jen verswak het, maar die indeks is steeds af met 12,0% vir die jaar tot op datum. Gebaseer op hierdie positiewe tekens voorspel internasionale finansiële analiste soos JP Morgan dat wêreldwye groei in hierdie kwartaal gaan verbeter.

Kommoditeitsnuus: ru-oliepryse ly uitgebreide verliese gedurende die afgelope week nadat opmerkings deur Saudi Arabië twyfel laat ontstaan oor of die voorgenome vergadering van sleutelprodusente tot ’n ooreenkoms sal lei om produksie te vries en sodoende die wêreldwye ooraanbod aan te spreek. Die hoop dat ’n ooreenkoms bereik sal word by die vergadering, gelei deur Rusland en Saudi Arabië op 17 April in Doha, was die vernaamste dryfveer agter die prysstygings na ’n amper 13-jaar laagtepunt in Februarie. Die mees onlangse kommentaar hieroor deur Saudi Arabië se kroonprins, Mohammed bin Salman, dui op onwilligheid om uitsette te bevries tensy ander verskaffers dit ook doen. Dit het verwagtinge vir ’n ooreenkoms (wat reeds nie baie hoog was nie) verder geknou.

Die markte wil hê dat die ru-olieaanbod iewers beperk word en nou het nuwe kommer oor die aanhoudende ooraanbod ontstaan as gevolg van kommentaar van Saudi Arabië dat die land slegs sal instem om produksie te bevries indien Iran en ander groot verskaffers bereid is om dieselfde te doen. Iran is al besig om produksie uit te brei sedert die opheffing van Westerse ekonomieë se kern wapensanksies in Januarie en dit dra by tot die oorversadigde mark. Ru-oliepryse is ook onder druk nadat verslae verskyn het wat aanvoer dat na die opheffing van sanksies die produksie van Iraniese ru-olie met 250 000 vate per dag vermeerder het in Maart.

Soos meeste van ons kliënte reeds weet is Brenthurst al vir baie jare ‘n groot voorstander van buitelandse beleggings; eerstens omdat ons gedink het dat die rand oorwaardeer was toe dit by R6,50 teen die dollar was, en tweedens omdat ons gedink het dat ander lande beter geleenthede verskaf het as SA. Ons het ook aktief na sektore en bateklasse gesoek wat nie in Suid-Afrika beskikbaar is nie, soos byvoorbeeld Biotegnologie, wat nog steeds na die kwaai daling einde verlede jaar en begin van hierdie jaar, die beste opbrengs oor vier jaar en meer gelewer het. Dit bly Brenthurst se opinie dat hierdie tendens nie gaan vinnig verander nie want (a) die plaaslike aandelemark is nog steeds duur relatief tot winsgewendheid en (b) daar is die meer as 80% kans dat ons afgegradeer kan word in die volgende ses tot 12 maande. Toegang tot die fondse wat ons gebruik in die biotegnologie-, demografie-, en gesondheid- sektore word spesiaal en uitsonderlik vir Brenthurst kliënte gereël. Indien u voel dat u portefeulje meer globale Blootstelling benodig, kontak gerus u Brenthurst finansiële raadgewer so gou as moontlik.